قال الدكتور محمود خطاب الرئيس التنفيذي والعضو المنتدب لشركة بي تك ، إن الشركة افتتحت أكبر فرع لها وأكبر فرع متخصص في بيع الأجهزه الكهربائية والإلكترونية في افريقيا ليس فقط في مصر وهو B.TECH MAX.
وأشار عبر حسابه الرسمي على موقع لينكد إن :” من 27 سنه وفي يوم 1 يوليو 1997 كان اول يوم في حياة الشركة واللي ابتدت واستمرت لمده 5 سنين بأسم اوليمبيك ستورز قبل ما يتم تغيير الأسم ل B.TECH كانت مغامره ومخاطره وتجربه جديده تماما من نوعها في الوقت ده ماكنش فيه حاجه في مصر اسمها Organised Retail ولا Chain Stores و لا تقسيط بيتم على نطاق كبير وواسع و كان المسيطر على التجاره في مصر ايامها شركات القطاع العام بنسبة تزيد عن 70 % من حجم السوق والباقي عباره عن Traditional Retail.”
تغيير طبيعة السوق
وأضاف :” في البداية الناس لما كانت بتسمع عن اللي بنحاول نعمله كان الأغلبية متوقعين فشل التجربه في خلال فتره قصيره لأن في رأيهم من الصعب جدا وقد يكون من المستحيل تغيير طبيعة السوق وكمان المستهلك مش هيقبل الفكر الجديد فكان معظم الرأي اللي بنسمعه بلاش تضييع وقت ومجهود وفلوس في حاجه صعبه كده جزء تاني من الناس ماكنش مستوعب او فاهم الفكره واحنا بنحاول نعمل ايه وجزء بسيط كان مبسوط بالفكر الجديد وبيشجعنا عليه.”
وتابع :” ابتدينا الرحله ب 3 فروع في المقطم والمعادي والمهندسين وقبل نهاية السنة افتتحنا أول فرع لنا خارج القاهره في أسيوط وواحده واحده ومع مرور الأيام ابتدينا نكبر ونزيد لحد ما أثبتنا نفسنا و ربنا أكرمنا وبقينا في خلال سنوات قليله اكبر شركة في مصر في مجالنا وابتدى الفكر الجديد ينتشر وابتدى شكل تجارة التجزئه في مصر يتغير و الفكر المشابه لنا ينتشر في مجالات اخرى غير الاجهزه الكهربائيه والمنزليه وابتدينا نشوف سلاسل تجاريه في مجال الملابس والسوبر ماركت والرياضه و الصيدليات واكيد الأجهزه الكهربائيه وحاجات تانيه كتير.”
وقال إن شكل الشركة تطور من أننا مجرد شركة توزيع وتجارة تجزئة لأن نكون لاعب اساسي ومؤثر في مجالات كتير زي التقسيط والأئتمان الأستهلاكي واللي ابتديناه من 27 سنه الي جانب التوزيع والتوكيلات التجاريه و الاونلاين على مستوى المستهلك وعلى المستوى التجاري من خلال منصة deelz وعلى مستوى ال B2B وكمان ال technolgy creation and development من خلال b_labs والتكنولوجيا الماليه من خلال mylo .
وتابع :” لما بنسترجع التاريخ ونشوف ايه اللي حصل في ال 27 سنه اللي فاتوا الحمد لله بنحس بالفخر بأن ربنا أكرمنا وقدرنا أننا مش بس نكبر وننجح انما يكون لنا تأثير ايجابي في تغيير شكل تجارة التجزئه في مصر على مدار العمر ده.”
وأضاف :” النهارده وفي تاريخ احتفالنا بمرور 27 سنه على بداية نشاطنا بنحتفل بأفتتاح اكبر فرع لينا واكبر فرع متخصص في بيع الأجهزه الكهربائيه والألكترونيه في افريقيا كلها مش في مصر بس B.TECH MAX.”
تجربة شرائية جديدة تماماً
ولفت إلى أن الفكرة ليست في المساحه إنما في تجربه شرائية جديدة تماما بنقدمها للمستهلك مش بس في مصر انما في المنطقه العربية وافريقيا ، مضيفا: “نتمنى بأذن الله انها تساهم مره جديده في تغيير و تطوير شكل ومنظومه وفكر تجارة التجزئه وخدمة المستهلك.”
ووجه الشكر لكل زميل في الشركة قائلا :” الف شكر لكل زميل في الشركه موجود معانا النهارده او كان موجود على مدار ال 27 سنه الماضيه وساهم في بناء الشركه ووصولها لما نحن عليه اليوم من غير كل واحد منكم عمرنا ما كنا هنقدر نوصل للمرحله دي ولا نستمر العمر ده كله بنمو وتطوير كل سنه .”
المصدر : موقع متناهي
