يُعد كاشات ، أول تطبيق للخدمات المالية في مصر يقدم تمويل متناهي الصغر “نانو فاينانس ” لأصحاب المشاريع الصغيرة ، ويعمل على تعزيز الشمول المالي.
وينشر موقع ” متناهي ” المتخصص في التمويل المالي غير المصرفي كافة التفاصيل المتاحة حول تطبيق كاشات ( سؤال وجواب ).
في البداية ..ما هو تطبيق كاشات؟
كاشات هو أول تطبيق في مصر يقدم تمويل متناهي الصغر (نانو).
كاشات هتساعدك بتمويل سريع يبدأ من ١٠٠ جنيه وحتى ١٥٠٠ جنيه بكل سهولة من غير إجراءات معقدة ونظم سداد تصل الى ٦١ يوم. كاشات مرخصة من هيئة الرقابة المالية.
ما هى الشروط والأوراق المطلوبة لاستخدام كاشات ؟
مفيش أوراق مطلوبة، كل المطلوب انك تكون مصري، أكبر من 18 سنة ومعاك بطاقة رقم قومي سارية على الأقل لمدة 3 شهور.
كيف تُنشئ حساب على كاشات ؟
1) حمل تطبيق كاشات من على جوجل ستور
2) وافق على الشروط والأحكام والتصاريح المطلوبة
3) صور البطاقة الشخصية الامامية و الخلفية.
4) اتصور صورة سيلفى بشكل واضح
5) اتاكد من صحة بيانات البطاقة و كمل بيانات الحساب
استنى تفعيل حسابك في خلال 48 ساعة بحد أقصى
ما هي خطوات السحب؟
لما بتنزل التطبيق وتعمل حساب عليه، بنسألك شوية أسئلة عشان نعرف عنك أكتر وعلى أساس ده التطبيق يحدد أقصى مبلغ تقدر تسحبه. لما بتوافق علي المبلغ، بيظهر لك طرق صرف مختلفة تختار منها زي أمان،فوري وفودافون كاش.
مصاريف الخدمة ؟
مصاريف الخدمة تتراوح بين 16% و28 % بناء على فترة السداد اللي بتختارها.
ما هي خطوات السداد؟
السداد بيكون على قسطين متساويين بشكل شهري، وتقدر تسدد عن طريق أمان، فوري أو فودافون كاش. ممكن كمان تستفيد بعروض خصم على المصاريف والرسوم لو دفعت المبلغ كله خلال أول أسبوعين أو أول شهر عن طريق انك تفعل العرض من خلال قسم الخصومات من على التطبيق.
ماذا يحدث إذا لم يتم سداد الاقساط في الموعد المحدد ؟
أولا: بتنزل عليك غرامة تأخير 3 جنيه عن كل أسبوع تأخير لحد ما تدفع الاقساط اللي عليك.
ثانيا : التقييم بتاعك بيتأثر و بيتم إبلاغ شركة الاستعلام الائتماني “ أي-سكور“، وممكن متقدرش تسحب أي مبالغ تانية من كاشات أو البنك أو أي مؤسسة مالية تانية.
وأخيرا: ممكن يتم اتخاذ الإجراءات القانونية ضدك.
ايه خطوات استلام التمويل من أمان ؟
1) لازم توافق على مبلغ التمويل المتاح لك في خلال ربع ساعة, لأن بعديها صلاحية حد التمويل بتنتهي.
2) اختار أمان من طرق الصرف. هيطلع رقم ايصال الاستلام و هيبقي صالح لمدة 3 أيام , روح بيه لأي فرع من فروع أمان أو أي مكان عليه علامة أمان.
3) بلغ الموظف رقم الايصال عشان يدخله علي المكنة مرتين. كاشات موجود في المكنه تحت قائمة تمويل متناهي الصغر.
4) هيوصلك رقم سري على التطبيق, بلغ الموظف الرقم عشان يأكد العملية.
5) استلم كاشاتك و متنساش تاخد ايصال الاستلام
كيف يتم تحويل مبلغ التمويل على محفظة فودافون كاش ؟
1) وافق على مبلغ التمويل واختار فودافون كاش من طرق الصرف
2) هيظهرلك رسالة تأكيد بالمبلغ ورقم الموبايل
3) وافق على الشروط والأحكام
المبلغ هيتحول لمحفظتك وتقدر تسحبه أي وقت
كيف يتم استلام التمويل من فوري ؟
1) لازم توافق على مبلغ التمويل المتاح لك في خلال ربع ساعة, لأن بعديها صلاحية حد التمويل بتنتهي.
2) اختار فوري من طرق الصرف. هيطلع رقم ايصال الاستلام و هيبقي صالح لمدة 3 أيام , روح بيه لأي فرع من فروع فوري بلس او اي مكان عليه علامة فوري.
3) بلغ الموظف رقم الايصال والموبايل المسجل على التطبيق عشان يدخله على المكنة. كاشات موجود في المكنه تحت كود 7394.
4) هيوصلك رقم سري على الرقم المسجل على التطبيق , بلغ الموظف الرقم عشان يأكد العملية.
5) استلم كاشاتك و متنساش تاخد ايصال الاستلام.
كيف يتم سداد التمويل عن طريق أمان؟
1) افتح التطبيق و فعل ايصال للسداد عن طريق أمان
2) روح أي فرع أو أي مكان عليه علامة أمان زي الأكشاك و السوبر ماركت
3) بلغ الموظف رقم الايصال عشان يدخله على المكنة . كاشات موجود في المكنه تحت قائمة التمويل متناهي الصغر
4) ادفع القسط و متنساش تاخد الايصال لأنه الدليل الوحيد على السداد.
كيف يتم سداد التمويل عن طريق محفظة فودافون كاش ؟
1) اختار فودافون كوسيلة للسداد
2) اكتب الرقم السري للمحفظة
3) هيوصلك رسالة نصية فيها رقم سري مؤقت لتأكيد تحويل المبلغ الى كاشات، ادخل الرقم وهيتم تحويل المبلغ من محفظتك.
كيف يتم سداد التمويل عن طريق فوري؟
1) افتح التطبيق و فعل ايصال للسداد من خلال فوري، هيوصل لك رسالة فيها رقم الايصال على رقم الموبايل المسجل في التطبيق
2) روح أي فرع من فروع فوري بلس او اي مكان عليه علامة فوري زي الأكشاك و السوبر ماركت – الدفع من خلال (فوري باي)
3) بلغ الموظف رقم الايصال (الرقم المرجعي)
4) ادفع القسط و متنساش تاخد الايصال لأنه الدليل الوحيد على السداد.
“ما هي الموبيلات اللى ممكن أنزل كاشات عليها” ؟
تطبيق كاشات بيشتغل على أي تليفون أندرويد فيه كاميرا خلفية عشان تصور بيها البطاقة وكاميرا أمامية عشان تصور بيها نفسك سيلفي و لازم يكون اندرويد أعلى من 5.
خدمة كاشات متوفرة في محافظات ومدن ايه ؟
كاشات حاليا متوفرة في القاهرة والإسكندرية والمنصورة والغردقة و بورسعيد و الإسماعيلية والسويس وبنها وطنطا والمحلة ودمياط, لكننا شغالين على تطوير التطبيق عشان نغطي مدن أكتر في المستقبل.
ليه حد التمويل قليل ؟ و ازاي اقدر ازوده ؟
التمويل ممكن يكون بسيط في الأول وده عشان انت لسه عميل جديد ومحتاج تبني ثقة بينك وبين كاشات ,وده بيكون من خلال الملف الشخصي الخاص بيك والتزامك في سداد التمويل في المواعيد المضبوطة ,ومع الوقت تقييمك هيعلى و هتقدر تاخد تمويل اكتر.
ممكن اطلب تمويل أكتر من مرة؟
ممكن طبعاً , تقدر تقدم تاني بعد مرور 3 أيام على سدادك للتمويل السابق.
ممكن أطلب أكتر من تمويل في نفس الوقت؟
لازم تسدد أي مبالغ عليك الأول قبل ما تطلب تمويل تاني
ليه طلب التمويل اترفض ؟
القرارات المتعلقة بالتمويل بيتم اتخاذها من خلال نظام آلي بناء على عوامل كتير منها إجاباتك على أسئلة طلب التمويل, مستوى دخلك و سدادك للتمويلات السابقة. احنا شغالين على تطوير التطبيق عشان نقدر نخدم عدد أكبر في المستقبل.
اعمل ايه لو محتاج مخالصة ؟
تقدر تكلمنا بعد سداد التمويل على 15022 عشان تقدم طلب استخراج مخالصة علما ان الاجراءات تحتاج بحد أقصى شهر من تاريخ تقديم الطلب.
أعمل ايه لو نسيت الرقم السري ؟
من خلال شاشة الدخول لحسابك في التطبيق ممكن تختار “نسيت الرقم السري“ هيطلب منك تصور البطاقة تاني عشان يتأكد من شخصيتك وهيبعتلك رقم سري جديد. أو ممكن تكلمنا علي رقم ١٥٠٢٢
أعمل ايه لو غيرت تليفوني؟
تقدر تستخدم حسابك علي موبايل جديد. كل اللي عليك انك تسجل دخول بحسابك الحالي علي الموبايل الجديد وهيتم ربط الحساب بالجهاز الجديد تلقائيا
أعمل ايه لو غيرت رقم موبايلي؟
تقدر تغير رقم الموبايل بنفسك من خلال التطبيق و هيجيلك مكالمة تأكيد على الرقم الجديد.
ليه التطبيق مش قادر يتأكد من رقم موبايلي ؟
لازم تتأكد الاول ان رقم موبايلك الحالي هو نفس الرقم اللي سجلت بيه على التطبيق, الموبايل فيه شريحة واحد بس شغالة ,وان نوع تليفونك بيدعم التطبيق.
لو موبايلك بشريحتين , اقفل اعدادات الشريحة التانية و حاول تاني. لو فضلت المشكلة موجودة, ممكن يبقي عطل في الشبكة و بننصحك تقدم في وقت تاني
ايه المعلومات اللي بتسجلها كاشات عني؟
لما بتستخدم كاشات, بنجمع المعلومات دي عنك :
– معلومات بتكتبها بنفسك زي اسمك و بيانات للتواصل ( عنوانك, بريدك الالكتروني, رقم تليفونك,مهنتك, سنك..الخ)
– معلومات بتتجمع تلقائيا لما بتستخدم التطبيق زي معدل الاستخدام, تاريخك الائتماني, عدد التعاملات..الخ
كل البيانات الخاصه بيك بتكون محفوظة في سرية تامة ومشفرة ومحدش يقدر يشوفها او يدخل عليها لان خصوصيتك ومعلوماتك مهمة جداً بالنسبة لنا.
ليه التطبيق بيطلب كل الصلاحيات دي؟
كاشات مرخصة من هيئة الرقابة المالية وبتقدم تمويل للأفراد من خلال الموبايل بضمانات قليلة وعلشان كده في معايير كتير لازم نتاكد منها زي ان الموبايل المستخدم في طلب التمويل يكون لشخص حقيقي، علشان يساعد التطبيق في تحديد التقييم وحد التمويل. كل البيانات الخاصه بيك بتكون محفوظة في سرية تامة ومشفرة ومحدش يقدر يشوفها او يدخل عليها لان خصوصيتك ومعلوماتك مهمة جداً بالنسبة لنا.
هيحصل ايه لو رفضت اني اشغل الصلاحيات دي؟
للأسف مش هتقدر تستخدم التطبيق سواء في تسجيل الحساب أو التقديم علي تمويل بدون الموافقة علي الصلاحيات دي.
المصدر : متناهي
